2014 yilning 2-10 yanvar kunlari mamlakatimiz maktab o'quvchilari o'rtasida bilimlar bellashuvining tuman (shahar) bosqichlari bo'lib o'tmoqda. Tanlovda 5- 6- 7- 8 sinf o'quvchilari 16 ta fan bo'yicha o'zaro bellashadilar. 

Ayni kunlarda bo'lib o'tayotgan bellashuvning ikkinchi bosqichida respublika bo'yicha jami 300 ming nafardan ortiq o'quvchilar ishtirok etmoqda. Shuningdek, umumta'lim maktablarining 9-sinf o'quvchilari ham 19 fandan fan olimpiadalarining ikkinchi bosqichida ishtirok etmoqda. 

Bellashuvlarda tanlovning adolatli va xolisligini ta'minlash maqsadida unda ota-onalar, mahalla faollari hamda mahalliy hokimiyat vakillari ham ishtirok etmoqda. 

Shuni alohida ta'kidlash lozimki fanlar bo'yicha nazorat turlari ham amaliy tomonga takomillashib bormoqda. Jumladan, chet tillari bo'yicha nazorat turlari sifatida a) tinglab-tushunish (tinglangan axborotni ingliz tilida yozma va og'zaki bayon qilish), b) o'qib-tushunish (o'qigan matni bo'yicha savollarga javob beradi) hamda grammatikaga oid test topshiriq (25 ta savol)lariga javob berish orqali bellashishlari belgilandi. Qolaversa, joriy yildan boshlab bellashuvlarda o'quvchilarning nutq madaniyatini o'stirish va ularning fikrlash doirasini kengaytirish maqsadida og'zaki imtihonlar ham joriy qilindi. 

Agar raqamlarga murojaat etadigan bo'lsak, 2011-2012 o'quv yilida bilimlar bellashuvining maktab bosqichida jami 1 294 250 nafar, 2012-2013 o'quv yilida maktab bosqichida jami 1 950 nafar, 2013-2014 o'quv yilida esa maktab bosqichida 2 152 653 nafar o'quvchi ishtirok etganiga guvoh bo'lamiz. 

Mazkur bellashuvning qishki ta'til kunlarida o'tkazilishi o'quvchilarning dam olish kunlarini yanada mazmunli, qiziqarli hamda foydali o'tishida muhim ahamiyat kasb etmoqda. 

Ma'lumot o'rnida aytish kerakki, mazkur bilimlar bellashuvinnig yakuniy respubika bosqichidan so'ng uning natijalari asosida respublika bo'yicha ta'lim muassasalari va hududiy xalq ta'limi boshqaruvi idoralarining 14 ta baholash parametrlari asosida reytinggi aniqlanadi. 

Bellashuvlarda o'quvchisi muvaffaqiyatli ishtirok etgan pedagoglar ish tajribasi o'rganilib, respublika miqyosida ommalashtiriladi va aksincha tanlovlarda qoniqarsiz ishtirok etgan ta'lim muassasalariga metodik yordam ko'rsatiladi. 

Xalq ta'limi vazirligi